මදුරු ඝනත්වය මනින බිටෝ දර්ශකය මේ වන විට 20 ඉක්මවා යෑමත් සමඟ ඩෙංගු වසංගත තත්ත්වයක් රට පුරා පවතින බව සෞඛ්‍ය කීට විද්‍යා නිලධාරීන්ගේ සංගමයේ සභාපති නජිත් සුමනසේන මහතා පැවසුවේය.
බිටෝ දර්ශකය 5ට අඩුවෙන් පවත්වා ගැනීමට සැලසුම් කළ ද ලෝක සෞඛ්‍ය සංවිධානය නියම කර ඇත්තේ දෙකට අඩුවෙන් පවත්වා ගත යුතු බවට යැයි ද ඒ මහතා ප්‍රකාශ කළේය.
ඩෙංගු වයිරසය ව්‍යාප්ත කරන ඊඩිස් ඊජිප්ටයි සහ ඇල්බොපික්ටස් මදුරු වර්ග පරිසරය තුළ මේ දිනයන්හි ඉහළ යෑමත් සමඟ ඩෙංගු ආසාදිතයන්ගේ වාර්තා වීම ද ඉහළ ගොස් ඇතැයි හෙතෙම පැවසීය.වසර 2017දී ඩෙංගු අධි වසංගත තත්ත්වයක් රට තුළ පැතිර ගිය අතර, සාමාන්‍යයෙන් වසර පහකට වරක් ඩෙංගු වසංගත තත්ත්වයක් පැමිණීම සිදු වන්නේ යැයි ද ඒ අනුව 2022 වර්ෂයේදී වසංගත තත්ත්වයක් මතුව ඇතැයි ද ඔහු පැවසුවේය.
